يا ترى إيه هو آخر تطورات ملف الطروحات الحكومية، هل الحكومة المصرية ناوية تفتح الباب على مصراعيه قدام القطاع الخاص ولا لأ، وإيه خطتها للمرحلة الجاية، وأي قطاع بالظبط هيتم طرحه؟..في الأيام الأخيرة، رئيس الوزراء مصطفى مدبولي طلع قال إنهم شغالين دلوقتي على توسيع برنامج الطروحات، وبالفعل في اجتماع تم مع وزير الاستثمار عشان نزود عدد الشركات اللي هتدخل السوق خلال 3 سنين قدام.بس خد بالك، مدبولي شدد على نقطة مهمة جدا، وفال ما ينفعش نعلن بدري عن تفاصيل الطروحات، عشان ده ممكن كل حاجة تبوظ، يعني مثلا لو تم تسريب سعر البيع أو توقيت الطرح، أسهم الشركات في البورصة ممكن تتأثر، واللي بيشتري هيتفاوض على سعر أقل، يعني الدولة هتخسر.عشان كده الحكومة بتتعامل مع الملف بحرفية، كل شركة بيتم تقييمها الأول من خلال بنوك استثمار متخصصة، وبعدها بيتم الإعلان عن تفاصيل الطرح في الوقت المناسب، وبالفعل ده اللي بيحصل دلوقتي بالضبط مع بنك القاهرة، بتحصل تقييمات شغالة بالتنسيق مع البنك المركزي، وأول ما التقييمات تخلص الطرح يبدأ.وبرنامج الطروحات ماوقفش زي ما ناس كانت فاكرة، لأ ده مدبولي أكد إن فيه 21 صفقة تمت فعلا وكانت بقيمة بتوصل لـ 6 مليار دولار، بس الحكومة مش واقفة عند كده، ده هي ناوية توسع عدد الشركات المطروحة وتتفتح الباب قدام الاستثمار الخاص أكتر وأكتر، وكل ده مش بيحصل عشوائي، ده فيه جداول زمنية، دراسات، تقييمات، يعني مفيش حاجة ماشية بالبركة.ومن هنا، قال المدير التنفيذي لشركة “الصك” لتداول الأوراق المالية، محمود عطا، إن البورصة المصرية دلوقتي فيها عمق كفاية، يعني السوق يقدر يستوعب طروحات جديدة بسهولة،وفعلا فيه مؤشرات إيجابية بتحصل زي استقرار نسبي في سعر الدولار ونمو في الأجور وتراجع في معدلات البطالة، يعني الجو العام ابتدى يتحسن والفرصة بقت سانحة إن الطروحات دي تتنفذ بجد.وده مش مجرد كلام أو وعود زي قبل كده ، ده حتى صندوق النقد الدولي كمان مش سايبنا، ووفده موجود في مصر حاليا وبيأكد دعمه الكامل لبرنامج الإصلاح الاقتصادي، وبيشيد بخطوات الحكومة في الطروحات.كمان، وزير المالية أحمد كجوك قال إن اقتصاد مصر بيتطور، وفي مؤشرات مالية قوية خلال الشهور اللي فاتت، وده بيأكد إننا ماشيين في السكة الصح.
