كل شوية نسمع في الأخبار..”الاحتياطي النقدي زاد”.. “الاحتياطي انخفض”.. طب هو إيه أصلًا الاحتياطي ده؟ وليه مهم بالشكل ده؟ وإزاي الرقم ده ممكن يأثر عليك.. سواء في سعر الدولار أو حتى في سعر العيش والزيت؟ في التقرير ده هنفهمك الموضوع كله ببساطة.. ومن غير تعقيد يعني إيه احتياطي نقدي؟ بيتكون من إيه؟ وليه بيزيد وينقص؟ والأهم.. إزاي بيأثر عليك في حياتك اليومية؟أول حاجة.. يعني إيه احتياطي نقدي من العملات الأجنبية؟تخيل إن البلد معاها خزنة طوارئ كبيرة.. فيها فلوس مش بالجنيه.. لأ.. فيها دولار.. يورو.. دهب.. سندات دولية.. وأصول تانية الخزنة دي اسمها “الاحتياطي النقدي” وبيحتفظ بيها البنك المركزي ليه؟هقولك .. علشان في وقت الأزمات.. زي أزمة اقتصادية.. أو أزمة استيراد.. أو سداد ديون.. الحكومة تقدر تفتح الخزنة دي وتستخدم منها.. عشان البلد ما تقعش.وبيتكون من إيه الاحتياطي؟الاحتياطي النقدي مش فلوس كده جت من السما.. لأ الاحتياطي بييجي من مصادر كتير.. زي: الصادرات.. لأن كل ما نبيع سلع وخدمات برا.. ناخد مقابل بالدولار.وكمان السياحة.. السايح اللي بييجي يصرف عملة أجنبية بيزود الاحتياطي.. بالاضافة الى تحويلات المصريين في الخارج.. اللي بيبعتوا لأهاليهم دولارات أو يورو.. ومعاهم الاستثمارات الأجنبية.. الشركات اللي بتيجي تستثمر في مصر ومعاها عملة صعبة.. وأوقات كمان.. القروض أو التمويلات الدولية.طب الاحتياطي ده فايدته إيه؟فايدته كبيرة جدًا.. ومش مجرد رقم في نشرة اقتصادية لأنه أول حاجة بيحافظ على استقرار الجنيه.. لو الدولار غلي.. البنك المركزي ممكن يتدخل ويضخ دولارات من الاحتياطي علشان يثبت السوق.بيوفر سلع أساسية..لو البلد محتاجة تستورد أكل.. دواء.. أو بترول.. الفلوس دي بتدفع من الاحتياطي.بيشجع المستثمرين.. الاحتياطي القوي معناه اقتصاد مستقر.. والمستثمرين بيحبوا الاستقرار.بيسدد ديون مصر..لو في قرض جاي معاده.. الحكومة بتستخدم الاحتياطي تسد بيه.. وتحافظ على سمعة مصر المالية.طب إمتى بيزيد.. وإمتى بينقص؟الاحتياطي بيزيد لما: الصادرات تزيد .. السياحة تنتعش.. تحويلات المصريين تكتر.. استثمارات أجنبية تدخل.. الحكومة تاخد تمويل خارجي.وبيقل لما: نسدد ديون خارجية كبيرة.. الأسعار العالمية للحاجات اللي بنستوردها تعلى.. السياحة تقل.. المستثمرين يخرجوا.. تحويلات المصريين تقل بسبب أزمة عالمية.طب هل ليه علاقة بسعر الدولار؟آه طبعًا.. كل ما الاحتياطي يكون قوي.. البنك المركزي يقدر يسيطر على سوق العملة.. ولو الاحتياطي ضعيف.. السوق يتحرك لوحده.. وسعر الدولار يعلى بسهولة.. ودي حاجة كلنا بنحس بيها في الأسعار اليومية.اللى لازم تعرفو .. ان الاحتياطي النقدي مش رفاهية.. دي شبكة الأمان اللي بتحافظ على اقتصاد البلد.. وعلى قيمة الجنيه اللي في جيبك.. وكل ما الاحتياطي كان قوي.. كل ما إنت كمواطن تكون في أمان أكتر قدام تقلبات السوق.
