هو إيه حكاية مليارات الدولارات اللي الهند قررت تضخهم في مصر.. وليه الهند عاوزو يبقالها قاعدة صناعية وموضع قدم في المنطقة الاقتصادية لقناة السويس والسفير الهندي قال إيه.. من ساعات سوريش كي ريدي ودا سفير الهند في القاهرة طلع واتكلم عن العلاقات المصرية الهندية وقال إن مصر والهند بتجمعهم النهاردة شراكة استراتيجية مميزة جدا.. ووصف الشراكة بأنها ثرية وعميقة وتحت إشراف مباشر من الرئيس عبد الفتاح السيسي ورئيس الوزراء الهندي ناريندرا مودي.السفير قال كمان إن الهند استثمرت بالفعل أكتر من 4 مليار دولار في مصر وإن الشركات الهندية ساهمت في توفير أكتر من 38 ألف فرصة عمل للشباب المصري وقال إن الأرقام دي لاترقي لمستوى الطموحات والعلاقات بين البلدين وإن الرقم دا متواضع وإن الفترة الجاية هيحصل قفزة في الاستثمارات الهندية وأنه بمجرد الانتهاء من المشروعات الهندية في السوق المصري الاستثمارات هتوصل 10 مليار دولار إضافية.طيب إيه أهمية تصريحات السفير الهندي؟شوف حضرتك لو متعرفش الهند دلوقتي رابع أكبر اقتصاد في العالم وعندها فرص استثمارية ضخمة وبتتوسع في الأسواق العالمية والناشئة .. يعني تقدر تقول كده هي بتطارد الصين في الأسواق الخارجية وزي ما الصين عملت منطقة صناعية ضخمة في اقتصادية قناة السويس وبنت قاعدة صناعية ليها في مصر الهند بقي بتخطط إنها تعمل قاعدة صناعية هندية في مصر وفي نفس المنطقة عشان تستفاد من الموقع الجغرافي لمصر ومن القدرات القوية للدولة المصرية في المواني والنقل واللوجستيات وخدمات التعهيد وقربها من الأسواق…طبعا إي استثمارات جديدة في مصر بتترجم لفرص عمل للشباب المصري وزيادة النشاط الاقتصادي وتعميق الأمن القومي المصري وفي نفس الوقت بتساهم في استقرار أسواق النقد الأجنبي وبيكون ليها دور كبير في انخفاض التضخم والأسعار في الأسواق.. يعني خير في كل حتة.. وفي نفس الوقت الاستثمارات بتجيب استثمارات ودا بيصنع معدلات نمو اقتصادي قوي بيكون ليه تأثير مباشر على تصنيف مصر الائتماني من وكالات التصنيف ودا بردو بيساعد في ضخ استثمارات ضخمة لأن التقارير دي بتفرق جدا مع أصحاب رؤس الأموال والاستثمارات في السندات المصري وأذون الخزانة.كمان تطوير التعاون مع الهند هيكون ليه فايدة تانية مهمة جدا وهي فتح الأسواق الهندية الواسعة جدا أمام الصادرات المصرية وخاصة إن فيه إمكانيات واسعة للتصدير من مصر تشمل الحمضيات والليمون والأسمدة والسلع المصنعة والعديد من المنتجات الأخرى حسب بيانات وأرقام الجهات الرسمية في مصر.
