يا ترى إيه اللي بيحصل في سوق الدهب، وليه الأسعار يوم في الطالع ويوم تاني في النازل؟ ، إيه هو السبب وامته الأسعار تستقر، وإيه هو أفضل وقت للشراء أو للبيع؟ وهل إحنا على وشك موجة صعود جديدة ولا لأ؟في الحقيقة، سوق الدهب العالمي بيشهد دلوقتي حالة من التذبذب السعري، يعني يوم في الطالع ويوم تاني في المنازل، وانهاردة شهدت أسعار المعدن الأصفر حالة استقرار نسب، بس ده حصل بعد هبوط حاد بنسبة 1.3% في الأسعار.واللي حصل ده، كان بسبب بيانات الوظائف الأمريكية اللي عملت قلبان، وده لأن التقرير اللي طلع من وزارة العمل في أمريكا قال إن عدد الوظايف زاد أكتر من المتوقع، وده خلا الناس تستبعد إن الفيدرالي هيخفض الفايدة قريب، يعني ممكن يخفض الفايدة مرة واحدة بس ودع متوقع يكون في شهر أكتوبر الجاي.وطبعا، ده بيأثر على الدهب بشكل مباشر، لأن لما الفايدة تفضل عالية في ناس كتير بتروح تحط فلوسها في البنوك بدل ما تشتري دهب، وده معناه إن الطلب على المعدن الأصفر هيقل وبالتالي أسعاره تنزل.عندك كمان، في محادثات تجارية بتحصل بين أمريكا والصين، خاصة بعد ما كان في 3 من مساعدي ترامب بيقابلوا مسؤولين صينيين في لندن عشان يناقشوا النزاعات الاقتصادية، ويحطوا حل لأزمة الرسوم وبالتالي الأسواق تهدى أكتر، ولكن التوقعات قالت لو المحادثات دي نجحت سعر الدهب هيتأثر وهينزل تاني، لكن لو فشلت هنبقى قدام موجة صعود جديدة، ومش بس للدهب.فوق كل ده، البنك المركزي الصيني أعلن إنه زود احتياطي الذهب عنده ب 60ألف أونصة في شهر مايو اللي فات، وطبعا كتير عارفين إن الصين هي اكتر دولة بتشتري دهب عشان تحوط نفسها بيه من أي أزمة اقتصادية زي ما حصل في حرب الرسوم الجمركية، والكلام ده بيلمح برضو إن في توترات جاية، وممكن جدا السوق يتأثر والدهب يغلى تاني.وهنا، نقدر نقول إن السوق بيقولنا إن كل حاجة ممكنة، ولكن مازال الغموض مستمر بخصوص مستقبل الدهب.نيجي بقى لمصر، واللي سعر الدهب عندنا بيتأثر بالسعر العالمي، عشان كده سجل عيار 21 حوالي 4670 جنيه للجرام، بتشجيل زيادة بقيمة حوالي 10 جنيه، وده معناه إن الناس مش بتشتري بكميات كبيرة دلوقتي، لكن فيه طلب بطيء ومستمر، كمان البنك المركزي قال إن التضخم الأساسي زاد، يعني في ارتفاع لأسعار السلع والمنتجات، وده معناه إن ناس كتير بتلجأ دلوقتي للدهب كتحويشة آمنة.والخلاصة هي إن مستقبل الدهب لسه ضبابي، والأيام الجاية هتحدد مصيره خاصة محادثات أمريكا والصين، ولكن لو حضرتك عايز تشتري دهب حاول تشتري في فترة انخفاض الأسعار، أما لو معاك دهب وعايز تبيعه فاقتنص أفضل فرصة لارتفاع الأسعار وتمم الصفقة.
